ചരിത്ര പശ്ചാത്തലം
🌿 ഭൂപ്രകൃതിയും ഐതിഹ്യങ്ങളും
കുന്നുകളും മലഞ്ചെരുവുകളും സമതലങ്ങളും നെൽപ്പാടങ്ങളും തെങ്ങിൻ തോപ്പുകളും വാഴത്തോട്ടങ്ങളും പച്ചക്കറിത്തോട്ടങ്ങളും മാവും പിലാവും കവുങ്ങും എല്ലാം നിറഞ്ഞ ഒരു പ്രദേശമാണ് ഞീഴൂർ ഗ്രാമപഞ്ചായത്ത്. 15 വാർഡുകളുള്ള ഈ ഗ്രാമപഞ്ചായത്തിന്റെ 1, 2, 3, 4, 12, 13, 14 (പകുതി) വാർഡുകൾ ഒരുഭാഗത്തും 5, 6, 7, 8, 9, 10, 11, 14, 15 (പകുതി) വാർഡുകൾ മറുഭാഗത്തും സ്ഥിതിചെയ്യുന്നു.
🛕 ക്ഷേത്ര പൈതൃകം
ശ്രീകൃഷ്ണസ്വാമി ക്ഷേത്രം, ആലുമ്മേക്കാവ്, കാട്ടാമ്പാക്ക് കൊട്ടാരം ദേവീക്ഷേത്രം എന്നിവ ഞീഴൂരിന്റെ പാരമ്പര്യമാണ്. തേവർത്തുമലയെക്കുറിച്ചുള്ള ഐതിഹ്യം ഏറെ ശ്രദ്ധേയമാണ്: ഏറ്റുമാനൂർ ക്ഷേത്ര പ്രതിഷ്ഠയ്ക്കായി രാജാവ് സ്വപ്നം കണ്ട വിഗ്രഹം ഇവിടെനിന്നാണ് ലഭിച്ചത്. മലയിൽ കിഴങ്ങുമാന്തുകയായിരുന്ന ഒരു ആദിവാസി സ്ത്രീയുടെ പാര തട്ടി രക്തം കണ്ട സ്ഥലത്ത് ശിവലിംഗം ഉയർന്നു വരികയും, രാജാവിന്റെ നിർദ്ദേശപ്രകാരം അത് കണ്ടെത്തി മൂന്ന് ദിവസം കൊട്ടാരം ദേവീക്ഷേത്രത്തിൽ വെച്ച് പൂജിച്ച ശേഷം ഏറ്റുമാനൂരമ്പലത്തിൽ പ്രതിഷ്ഠിച്ചു എന്നുമാണ് ഐതിഹ്യം. ഒൻപതാം വാർഡിലെ ഈ മലയും കൊട്ടാരം ദേവീക്ഷേത്രവും തമ്മിലുള്ള ബന്ധം ഞീഴൂരിന്റെ ചരിത്രത്തിലെ നിർണ്ണായകമായ ഒരു അധ്യായമാണ്.
⛪ മരങ്ങോലി സെന്റ് മേരീസ് ചർച്ച്
രണ്ടാം വാർഡിൽ 1918-ൽ സ്ഥാപിച്ച സെൻ്റ് മേരീസ് ചർച്ച് മരങ്ങോലിയുടെ ചരിത്രം ഏറെ ശ്രദ്ധേയമാണ്. ഒന്നാം ലോകമഹായുദ്ധാനന്തരം പട്ടിണിയും വസൂരിയും നാടിനെ വലച്ചപ്പോൾ, ഇലഞ്ഞിപ്പള്ളിയിൽ നിന്നുള്ള വിശുദ്ധ സെബസ്റ്റ്യാനോസിന്റെ കഴുന്ന് പ്രദക്ഷിണം മരങ്ങോലിയിൽ എത്തുകയും, ഇപ്പോൾ പള്ളി ഇരിക്കുന്ന സ്ഥലത്ത് ഒരു പന്തൽ കെട്ടി രൂപം പ്രതിഷ്ഠിക്കുകയും ലദീഞ്ഞ്, പ്രസംഗം മുതലായവ നടത്തുകയും ചെയ്തു. അന്ന് പ്രസംഗമദ്ധ്യേ പൗലോസ് പള്ളിക്കാപ്പറമ്പിൽ അച്ഛൻ ഈ കുന്നിൻപുറം ദേവാലയത്തിന് അനുയോജ്യമാണെന്ന് പ്രസ്താവിച്ചു. തുടർന്ന് നാട്ടുകാർ സ്ഥലം വാങ്ങി ഒരു ഷെഡ് നിർമ്മിച്ച് 1917-ൽ അച്ഛൻ ആദ്യമായി ദിവ്യബലി അർപ്പിച്ചു. 1924-ൽ ഷെഡ് പുതുക്കി പള്ളി നിർമ്മിച്ചു. 1969-ലാണ് ഇന്നു കാണുന്ന മനോഹരമായ ദേവാലയം പാലാ രൂപതയുടെ മെത്രാനായിരുന്ന മാർ സെബാസ്റ്റ്യൻ വയലിൽ വെഞ്ചരിച്ച് ഉദ്ഘാടനം ചെയ്തത്.
🏫 വിദ്യാഭ്യാസവും സാമൂഹിക മുന്നേറ്റവും
സ്വാതന്ത്ര്യത്തിന് വളരെ മുമ്പ് ഭാരതത്തിലാകെയും സംസ്ഥാനത്ത് പ്രത്യേകിച്ചും നിലനിന്നിരുന്ന അടിമത്വവും ജാതിവ്യവസ്ഥയും നമ്മുടെ ഗ്രാമങ്ങളിലും ശക്തമായിരുന്നു. കോട്ടയം കേന്ദ്രീകരിച്ച് പ്രവർത്തിച്ചിരുന്ന മിഷനറിമാർ ഞീഴൂർ പഞ്ചായത്തിലെ വാക്കാട് പ്രദേശം (ഇന്നത്തെ 6-ാം വാർഡ്) വിലക്ക് വാങ്ങി ഒരു പള്ളി സ്ഥാപിക്കുകയും, അധസ്ഥിത വിഭാഗങ്ങളെ ക്രിസ്തുമതത്തിലേക്ക് പരിവർത്തനം നടത്തി പള്ളിയുടെ ഭൂമിയിൽ താമസിക്കാനും കൃഷി ചെയ്യാനും അനുവാദം നൽകുകയും ചെയ്തു. 1900-ഓടെ വാക്കാട് കേന്ദ്രീകരിച്ച് ഒരു പ്രൈമറി സ്കൂൾ സ്ഥാപിക്കപ്പെട്ടു (വാക്കാട് സി.എം.എസ് യു.പി സ്കൂൾ). സ്വാതന്ത്ര്യാനന്തരം സ്ഥാപനങ്ങൾ സി.എസ്.ഐ സഭയ്ക്ക് കൈമാറി. സ്കൂൾ ഇന്നും പഴയ പേരിൽ തന്നെ അറിയപ്പെടുന്നു.
🌿 വൈദ്യശാസ്ത്രം & പ്രശസ്തർ
വക്കച്ചൻ വൈദ്യൻ, നിരപ്പേൽ കൊച്ചുവൈദ്യൻ, പത്മനാഭപിള്ള, ഔസേഫ് വൈദ്യൻ തുടങ്ങിയവർ വൈദ്യരംഗത്തെ പ്രമുഖരാണ്. കെ.എൻ. കൃഷ്ണൻ നമ്പൂതിരി, ഡോ. സി.ആർ. വിനോദ് കുമാർ, ഒളിമ്പ്യൻ ബിനോയി ലൂക്കോസ് എന്നിവർ നാടിന്റെ അഭിമാനമാണ്.
🎨 കലയും സാഹിത്യവും
50-ലധികം ഗ്രന്ഥങ്ങളുടെ കർത്താവ് വർഗ്ഗീസ് കാഞ്ഞിരത്തുങ്കൽ, കഥകളി ആചാര്യൻ പള്ളിപ്പുറം രാസ്ക്കരൻ നായർ തുടങ്ങിയവർ കല, സാഹിത്യ മേഖലകളിൽ ഞീഴൂരിന്റെ പ്രഭ ഉയർത്തിയവരാണ്.