ഞീഴൂർ
ഗ്രാമ പഞ്ചായത്ത്

ഞീഴൂർ ഗ്രാമപഞ്ചായത്ത് കേരളത്തിലെ പഴമയും ഗ്രാമീണ പൈതൃകവും നിലനിർത്തുന്ന ഒരു പ്രദേശമാണ്. കോട്ടയം ജില്ലയുടെ വടക്കു ഭാഗത്ത് എറണാകുളം ജില്ലയോട് ചേർന്ന് സ്ഥിതിചെയ്യുന്ന ഞീഴൂർ ഗ്രാമപഞ്ചായത്ത് തോടുകളും പാടങ്ങളും കൊണ്ട് സമ്പന്നമായ ഭൂപ്രദേശമാണ്. ഇതിന്റെ വടക്ക് ഇലഞ്ഞി പഞ്ചായത്തും തെക്ക് കടുത്തുരുത്തി, കുറവിലങ്ങാട് പഞ്ചായത്തുകളും പടിഞ്ഞാറ് മുളക്കുളം, കടുത്തുരുത്തി പഞ്ചായത്തുകളും കിഴക്ക് മരങ്ങാട്ടുപിള്ളി, ഉഴവൂർ പഞ്ചായത്തുകളും സ്ഥിതിചെയ്യുന്നു. കടുത്തുരുത്തി വില്ലേജിൽ ഉൾപെട്ടിരുന്ന ഞീഴൂർ, കാട്ടാമ്പാക്ക്, തിരുവാമ്പാടി പാഴുത്തുരുത്ത്, മരങ്ങോലി, കാഞ്ഞിരമറ്റം എന്നീ കരകൾ ചേർത്ത് 1953 ആഗസ്റ്റ് 15 ന് ഞീഴൂർ പഞ്ചായത്ത് നിലവിൽ വന്നു.

കടുത്തുരുത്തി വില്ലേജിൽ ഉൾപ്പെട്ടിരുന്ന ഞീഴൂർ, കാട്ടാമ്പാക്ക്, തിരുവാമ്പാടി, പാഴുത്തുരുത്ത്, മരങ്ങോലി, കാഞ്ഞിരമറ്റം എന്നീ കരകൾ ചേർത്ത് 1953 ആഗസ്റ്റ് 15-ന് ഞീഴൂർ പഞ്ചായത്ത് രൂപീകൃതമായി. അന്നത്തെ ആരോഗ്യ മന്ത്രിയായിരുന്ന ബഹു. വി. മാധവനാണ് പഞ്ചായത്തിന്റെ ഔദ്യോഗിക ഉദ്ഘാടനം നിർവഹിച്ചത്.

പഞ്ചായത്തിന്റെ ആദ്യ ഓഫീസ് ശ്രീ എം. സി. പോത്തന്റെ ഉടമസ്ഥതയിലുള്ള കെട്ടിടത്തിലായിരുന്നു പ്രവർത്തനം ആരംഭിച്ചത്.തുടക്കത്തിൽ 7 വാർഡുകളാണ് ഉണ്ടായിരുന്നത്. 1956 ൽ കടുത്തുരുത്തി വില്ലേജ് രണ്ടായി തിരിച്ച് ഞീഴൂർ പഞ്ചായത്ത് ഉൾപ്പെടുന്ന പ്രദേശം ഞീഴൂർ വില്ലേജായി പ്രവർത്തനമാരംഭിച്ചു. 1963 ൽ ശ്രീ എം. സി. പോത്തൻ സംഭാവന ചെയ്ത 15 സെന്റ് സ്ഥലത്ത് പഞ്ചായത്ത് കെട്ടിടം പണിതീർത്തു.

പഞ്ചായത്തിന്റെ വികസനത്തിനായി ശ്രീ ചെറിയാൻ തച്ചേട്ട് 50 സെന്റ് സ്ഥലം സൗജന്യമായി സംഭാവന നൽകി. ഈ സ്ഥലത്താണ് പൊതുമാർക്കറ്റും കമ്മ്യൂണിറ്റി ഹാളും സ്ഥാപിക്കപ്പെട്ടത്. കെട്ടിട നികുതി, തൊഴിൽ നികുതി, ലൈസൻസ് ഫീസ് എന്നിവയാണ് പഞ്ചായത്തിന്റെ പ്രധാന തനത് വരുമാന മാർഗങ്ങൾ.

ഐ.എച്ച്.ആർ.ഡി.യുടെ കീഴിൽ പ്രവർത്തിക്കുന്ന അപ്ലൈഡ് സയൻസ് കോളേജ് പഞ്ചായത്തിലെ ഏക ഉന്നത വിദ്യാഭ്യാസ സ്ഥാപനമാണ്. കൂടാതെ ഹയർ സെക്കൻഡറി സ്കൂളുകൾ, ഹൈസ്കൂൾ, യു.പി. സ്കൂളുകൾ, എൽ.പി. സ്കൂളുകൾ, അങ്കണവാടികൾ, വായനശാലകൾ, സാംസ്‌കാരിക നിലയം എന്നിവ പഞ്ചായത്തിന്റെ വിദ്യാഭ്യാസ-സാംസ്‌കാരിക രംഗത്തെ ശക്തിപ്പെടുത്തുന്നു.

പ്രാഥമിക ആരോഗ്യ കേന്ദ്രം, സബ് സെന്ററുകൾ, ആയുർവേദ, ഹോമിയോ ഡിസ്പെൻസറികൾ എന്നിവ ആരോഗ്യരംഗത്തെ പ്രധാന സ്ഥാപനങ്ങളാണ്. കൃഷിഭവൻ, വെറ്ററിനറി ഡിസ്പെൻസറി, ക്ഷീരവികസന സേവനങ്ങൾ എന്നിവ കാർഷിക-മൃഗസംരക്ഷണ മേഖലയെ ശക്തിപ്പെടുത്തുന്നു. സാമൂഹിക ഐക്യത്തിലും അടിസ്ഥാന സൗകര്യ വികസനത്തിലും മാതൃകാപരമായ പ്രവർത്തനങ്ങൾ കാഴ്ചവെക്കുന്ന പഞ്ചായത്താണ് ഞീഴൂർ.